Hankintavirastosta

Hankintavirasto on tietokeskus julkiselle hankinalle. Se on muterni virasto joka antaa tuen niile jokka osalistuva julkisessa kaupassa kehittämällä ja välittämällä julkisen hankinan tietoja, instrymenttiä ja keinoja.

Met kehitämä hyvän julkisen kaupan missä pääpiste on kestävät, luovat ja tehokhaat hankinat.

Julkinen hankinta

Julkinen hankinta merkittee ette hankinan viranomhainen ostaa, hyyrää eli muula tavala hankkii tavaroita, palveluita eli rakenusentreprenaatia. Hankinan viranomhaisten esimerkkiä on virastoja valtion tasola, kunnissa ja maakäräjissä sekä kunnaliset eli valtioliset puulaakit eli hallinot.
Ruottin julkiset hankinat kattavat 625 miljaartia kruunua joka vuosi. Se vastaa viies osan BNP:stä. Oikein käytetty hankinta saattaa antaa yhteiskunnale suuria voittoja. Se on voimakas instrymentti joka vaikuttaa yhteiskunnan ekonomhiin. Valtio, maakäräjät ja kunnat ostavat julkisen hankinan kautta monenlaista tavaraa kontturimateriaalista, urheiluarenoista ja konsylttipalveluista aina siukkahoithoon ja huolthoon.

Hankinnantuki

Hankintaviraston tehtävä on ette antaa tukea julkisen toiminan alala esimerkiks ostajalle ja hankkijalle vähentämällä epävarmuutta eri asiakysymyksissä ja näyttää säänöitten kehän maholisuuksia.

Päästä tekemhään hyvän kaupan vaatii ette hankinan viranomhainen laittaa strateekisen otheen ostoprusessista joka sisältää kaiken tarpheen analyysistä ja tavotheista aina tuloksitten valvonthaan saakka. Tietojen lissäämiseksi kuinka ostoprusessi toimii met olema ottanheet framile kuvailuja jokka askel kerrala auttavat sinua valmistautumhaan, viemhään läpi ja seuraamhaan ylös hankinan.

Tärkeä osa hankinan työn tuesta on ette kehittää kestävää hankintaa. Kestävä hankinta saattaa vaikuttaa paremphaan miljhöön ja sosiaalisihiin eelytykshiin. Sen lisäks met työskentelemä ette eistää luovanystävälistä hankintaa ja toimia ette enemän leverantööriä, esimerkiks pienet ja keskisuuret yritykset osalistuvat hankinthoin.

Met haluama kans vahvistaa hankinan strateekista merkitystä julkiselle toiminalle. On olemassa hyviä eelytyksiä luoa hyviä kauppoja ja samala tueta kestävää kehitystä ja varmistaa hyvän markkinan kilpailun.
Julkisen hankinan kysymyksistä sie saatat kääntyä meihin:
http://www.upphandlingsmyndigheten.se/kontakta-oss/

 

 

Senast uppdaterad:

Relaterad information